حكايتي
اسمعوا مني حكايتي بين السطور
قلب هش باش بين فك زمن مسعور
انا الوحداني رغم الزحمه
انا نور النار وجوايا العتمه
هتلاقوني في صوت الوجع المكتوم
مشاعري كريمة واحساسي بيها معدوم
انا الطبيب والقلب بالالم مخمور
كنت كل حاجه وعكسها
حلو الدنيا وانا اللي شارب مرها
انا اللي كاره انا اللي حابب
انا ضل الوحده وللكل صاحب
انا التايه من نفسي ورافضني الحس والشعور
لسه الحكايه شغاله
دي بس كانت البدايه
لسه المسرحيه ما انتهتش
والاوجاع مني ما استكفيتش
حتي الالم في الشريان عجبه المكان
حب الاعتكاف رافض الرحيل
حالف بطول عمره مايفارقه تان
وانا قاعد باحسبله في الليالي والشهور
الحزن جاي يطبطب بسخريه
زي العدا فرحان شمتان فيا
بيعزفلي الانين والاسم بيسمعني اغنيه
حتي الفرح روحتله لقيتني مش في الدور
طول عمري كنت الحيله واد فرفور
ابويا من فرحته بيا طار
وسكنلي احلامي بالمطار
تحلق ترفرف تحط وقت ماتريد
تيجي وتتحق مهما كانت بعيد
مفيش كتير علي محمد
يطلب يؤمر ويزيد
ما انا كل قلب ابويا
ده انا اول واخر الذكور
كعادته بررذالته بسقالته
مارضيش الزمن واخدها علي كرامته
غدر بيا واستكتر فرحتي كمان
وراح ابويا وفاتني وحيد عريانوفي عز احتياجي واشتياقي
اني الاقي حكمة اب
وقفت حياتي وجه اصعب مطب
اتبدلت الاحول والهم للقلب طال
وفرض اقامته الجبريه
ونشر جناحاته واعوانه حواليا
بيعاقب فرحتي في يوم وانه لقاني مسرور
ارجعلي يا ابا نفس ابوس اقدامك
واحشتني المشيه بحنيه
وتعليقتك بايديا
وانا مهدي ولا تلاقيني قدامك
‘وعليا ساند وتقولي اني ايامك الجايه
واحشتني ابتسامة قسوتك
ولا ضحكة وقت الغضب كانت رنة كلمتك
غيابك صدقني شقلب حياتي
كسرني قسمني. بداية اهاتي
كنت عايش في ضلك وماعرفتش اقولك
دلوقتي هاسمعهالك وادعيهالك رحمه ونور
دي حكايتي من بين السطور
قلب هش باش بين فك زمن مسعور