ياوزارة الاعلام كفياك استهزاء بعقول ولادنا
منشور على صوت الوطن بقلم ساميه جمال 2020/9/19
ساميه ابراهيم تكتب
امنعي المهرجانات اللي خربت عقولهم ودمرت تفكيرهم وبقا واقف عند نقطه واحده وهي ان الخبط والرزع ده هو التقدم هو فضفضه عن كبتهم
اعطبهم ورقه والوان يرسموا الشمس وهي جايه بنورها بتضحك بتطل علي العالم بامل جديد بعد ظلمة ليل طويل
اعملي برنامج ترفيهي فيه مسابقات عشان تخلقي بينهم روح المنافسه في زمن اتسلبت فيه الاراده وروح المجاذفه
اعملي ندوات دينيه تعلم بناتنا المقبلات علي الزواج ازاي تتعامل مع جوزها وتحاول تخلق روح المرح في البيت بدل الاستهتار بعقول بناتنا واخدهم وسيلة اعلان رخيصه في دعايه قذره
علمي امهاتنا امور الدين وان العطف والرحمه والانسانيه مطلوبين في كل الاوقات ومع كل الناس
افرضي عقوبه علي تارك الصلاه بالتكاتف مع وزارة الاوقاف بدل المساجد اللي فضيت واتملت المقاهي الليليه والكافيهات والحدائق
ساعدي الامهات علي غرس قيم ومبادئ اتربينا عليها لاولادهم احنا بنعلم والشارع ووسائل الاعلام بتفسد
احنا شعب متخلف بجد بكل معاني الكلمه شعب همجي فوضوي كل حاجه يجري ياخدها بهزار ويقلدها من غير ميشوف ان كانت مناسبه له ولا لا
بجد انا حزينه علي الانهيار اللي احنا فيه هنسيب ايه لاولادنا وهما علي حافة الطريق غارقين في دوامة الحياه شباب عندهم عشرين سنه واحبطوا من الدنيا وكرهوها وبينتحروا ودا ان دل علي شئ فانما يدل علي قلة الوعي الديني مما ترتب عليه ضعف الايمان والاستهتار بالروح
ياريت كلنا نتكاتف ونشبك ايدينا ضد التيار اللي هياخد ولادنا في طريقه ويدمرهم
علامات القيامه ظهر منها كتير ياريت نصحي من الغيبوبه قبل فوات الاوان سيدنا محمد ميستاهلش مننا كده هو اختار الامه وفضلها علي نفسه يبقا لازم نصون الامانه ونحافظ عليها
اسال الله لي ولكم الهداية وصلاح الاحوال