الحلم المسافر
*************
كده ينفع
تكتب بايدك على قلبى
يعيش العمر يتوجع
ويئن النبض فى ضلوعى
ب أه مخنوقه مابتطلع
آه حزينه مرسومه بسكاتى
فى ملامحى باينه وبتلمع
دموع جاريه على خدودى
بتشق فيها وبتلسع
لا بأيدى تطيب جراح قلبى
ولا عندى ليها دوا ينفع
كام جرح ف قلبى بين ضلعى
محبوس جوايا مابيطلع
كام آهه بتجرى ف عروقى
مع دمى تشق وبتخلع
بقيت روحى
كده ينفع
دموعى تبات مابين رمشى
تسيل م الليل وتتجمع
على خدودى
وماليها نهار كمان يطلع
ولو امنع دمعى عن رمشى
وثوانى وبعدها يرجع
وازاى دموعى ماتنزلشى
وايه يحوشها أو يمنع
مين قال قلبى مايحزنشى
أوقال عمرى ما أتوجع
أو دمعة عين ماتخرجشى
م الجفن خارجه وبتمزع
انا رافع ليك رايه بيضه
صافيه ولونها ما بيخدع
ولا فيها نجوم ولا زينه
غير فرع زيتون ومتجمع
ف بياض ناصع على رايه
والقلب حزين وبيدمع
ف حكايه مكتوبلها نهايه
م/محمد بدوى أبوالعلا